विपी कोइरालाको जेल डायरी कृति माथि परिचर्चा

९ चैत्र, हेटौँडा । विश्वेश्वर प्रसाद कोइरालाको ‘जेल डायरी’ कृतिमाथि हेटौंंडामा परिचर्चा भएको छ ।
बी.पी विचार समाजको आयोजनामा कोइरालाका जेल जीवनका टिपोट ‘जेल डायरी’ कृतिमाथि परिचर्चा गरिएको हो । विश्वेश्वर प्रसाद कोइरालाले २०१८ पौष १ देखि २०२२ कात्र्तिक २५ गतेसम्म जेल जिवनको समयमा लेख्नुभएको दैनिकीलाई लेखक शंकर तिवारीले सम्पादन गर्नुभएको हो । लेखक घनश्याम घिमिरेको सहजीकरणमा उक्त पुस्तकको विषयवस्तु र सन्दर्भमा आधारित भएर शुक्रबार चर्चा परिचर्चा गरिएको हो । प्रारम्भमा लेखक घिमिरेले परिचयात्मक टिप्पणी राख्नुभएको थियो । ‘जेल डायरी’ अध्ययन गर्दै जाँदा बी.पीका विचार र बी.पी दुबैलाई महसुस गर्न सकिने घिमिरेले बताउनुभयो । निर्वासित जिवनमा बी.पीको साहित्य जीवन उर्वर रहेको उहाँले बताउनुभयो । सम्पादक तिवारीले ‘जेल डायरी’ सम्पादनका क्रममा कोइरालाद्वारा लेखिएका स्मरण डायरी ‘जेल जर्नल’कै भाषामा समदूरी कायम राखेको बताउनुभयो । कोइरालाले अंग्रेजी भाषमा लेख्नुभएको डायरीलाई नेपालीमा अनुवाद गरिएको उहाँले बताउनुभयो । आदर्श, निष्ठा, सिद्धान्त त्यागेर जेल बाहिर निश्क्रिय रहने नेता भन्दा जेल भित्रको बौद्धिक सक्रियता भएको नेता प्रेरणाको स्रोत हुने सम्पादक तिवारीले बताउनुभयो ।
कार्यक्रममा बिपी विचार समाजका अध्यक्ष विनोदचन्द्र कोइराला, उपाध्यक्ष प्रदिप कोइराला, नेपाली काँग्रेस मकवानपुरका सभापति बुद्ध लामा, सचिव भीमसेन महत, पुर्व जिल्ला सभापतिद्धय रामचन्द्र अर्याल माइकल र रघुरमण न्यौपाने, वरिष्ठ पत्रकार प्रताप विष्ट, वरिष्ठ अधिवक्ता केशव प्रसाद काफ्ले लगायतको आथित्यता रहेको थियो ।