बकैया गाउँपालिकामा बृहत स्वास्थ्य शिविर सुरु

२३ चैत्र, हेटौँडा । बकैया गाउँपालिकामा बृहत स्वास्थ्य शिविर सुरु भएको छ ।
बि.पि. चिन्तन प्रतिष्ठान काठमाडौको आयोजना र नेपाल परिवार नियोजन संघ र निको अस्पताल प्रा.लि हेटौंडाको प्राविधिक सहयोग पालिकाको समन्वयमा शिविर सञ्चालन गरिएको हो । नेपाली कांग्रेसकी सहमहामन्त्री महालक्ष्मी उपाध्याय डिनाको प्रमुख आतिथ्यतामा स्वास्थ्य शिविरको उद्घाटन गरिएको हो । कार्यक्रममा बोल्दै सहमहामन्त्री उपाध्यायले राज्यका हरेक तहले प्राणघातक दीर्घरोगको निशुल्क उपचारको व्यवस्था गर्नुपर्नेमा जोड दिनुभयो । राज्यले मृगौला, क्यान्सर, स्पाइनल इन्जुरीका समस्या भएका बिरामीलाई दिदै आएको जिविकोपार्जन भत्ता थप गर्नुपर्ने उहाँको भनाई छ । पछिल्लो समय कलेजो, मिर्गौला र क्यान्सर जस्ता प्राणघातक दीर्घरोगका बिरामी बढ्दै गएकोमा उहाँले चिन्ता व्यक्त गर्नुभयो । सहमहामन्त्री उपाध्यायले बिपि प्रतिष्ठानले सुरु गरेको शिविरलाई अझै दुर्गम भेगहरुमा पु¥याउन पहल गर्ने प्रतिबद्धता समेत व्यक्त गर्नुभयो ।
शनिबारसम्म चल्ने शिविरमा ९ जना विशेषज्ञ डाक्टरहरुले स्वास्थ्य परीक्षण गरिरहेका छन् । पालिका अध्यक्ष धर्मराज लामिछानेको अध्यक्षतामा भएको उद्घाटन कार्यक्रममा बिपि चिन्तन प्रतिष्ठान केन्द्रिय कोषाध्यक्ष एवं स्वास्थ्य शिविर संयोजक धुब्र बहादुर पाण्डे, गाउँपालिका उपाध्यक्ष भक्त बहादुर खत्री, नेपाली काङ्ग्रेसका पूर्व जिल्ला सभापति रघुरमण न्यौपाने, बकैया गाउँपालिका निवर्तमान अध्यक्ष दामोदर खनाल लगायतको उपस्थिति थियो ।